| |
TDV Bakı Türk
Liseyində tədris ilinin yarımili
çərçivəsində 6–11-ci sinif
şagirdlərini əhatə edən
qiymətləndirmə imtahanları
keçirilib. Təhsil keyfiyyətinin
monitorinqi və şagirdlərin
bilik-bacarıqlarının obyektiv
şəkildə qiymətləndirilməsi
məqsədilə təşkil olunan
imtahanlar 3 saat davam edib.
6–7–8-ci siniflər üzrə keçirilən
böyük summativ qiymətləndirmə
(BSQ) şagirdlərin yarımil
ərzində qazandıqları akademik
bilikləri, fənlərarası
bacarıqları və tədris proqramına
uyğun inkişaf səviyyəsini
müəyyənləşdirməyə xidmət edir.
9–10–11-ci siniflər üzrə
keçirilən buraxılış imtahanı isə
şagirdlərin növbəti təhsil
mərhələlərinə hazırlıq
səviyyəsini və əsas fənlər üzrə
biliklərini qiymətləndirməyi
hədəfləyir.
İmtahan Azərbaycan dili və
ədəbiyyatı, riyaziyyat, xarici
dil (ingilis dili), fizika,
kimya, biologiya, tarix və
coğrafiya fənləri üzrə test
tapşırıqlarından ibarət olub.
Lisey rəhbərliyi və nəzarətçi
müəllimlər imtahan prosesinin
sakit, intizamlı və təşkilati
baxımdan yüksək səviyyədə
keçirilməsini təmin ediblər.
Test imtahanlarında ümumilikdə
1000-dən artıq şagird iştirak
edib.
Nəticələrlə bağlı ətraflı
məlumat yaxın günlərdə
açıqlanacaq.
Lisey rəhbərliyi imtahanlarda
iştirak edən bütün şagirdlərə
uğurlar arzulayır və prosesin
təşkili və keçirilməsində əməyi
olan müəllim və texniki heyətə
təşəkkürünü bildirir.
|
|
