| |
Bu gün TDV Bakı
Türk Liseyində 29 Oktyabr –
Türkiyə Cümhuriyyətinin elan
edilməsinin 102-ci ildönümünə
həsr olunmuş təntənəli tədbir
keçirilib. Tədbirdə qonaqlar,
məktəb rəhbərliyi, müəllim
heyəti, şagirdlər və valideynlər
iştirak ediblər.
Tədbir Azərbaycanın və
Türkiyənin Dövlət Himnlərinin
səsləndirilməsi ilə başlayıb.
Ardınca liseyin müdiri Kadir
Bektaşoğlu çıxış edərək
iştirakçıları bayram
münasibətilə səmimi-qəlbdən
təbrik edib. O, Mustafa Kamal
Atatürkün liderliyi ilə qurulan
Türkiyə Cümhuriyyətinin türk
dünyasında dövlətçilik
ənənələrinin möhkəmlənməsində
mühüm rol oynadığını vurğulayıb.
Lisey müdiri çıxışında həmçinin
Azərbaycan və Türkiyə arasında
qardaşlıq münasibətlərinin
tarixi köklərinə toxunub, təhsil
sahəsində əməkdaşlığın gənc
nəslin formalaşmasında xüsusi
əhəmiyyət daşıdığını qeyd edib:
“Biz bir millət, iki dövlətik.
Burada yetişən hər bir şagird
həm Azərbaycanı, həm də
Türkiyəni layiqincə təmsil
etməlidir.”
Tədbir çərçivəsində şagirdlər
tərəfindən ədəbi-bədii
kompozisiyalar, səhnəciklər,
musiqi nömrələri və şeir
söyləyişləri təqdim olunub.
Şagirdlərin ifası tədbir
iştirakçıları tərəfindən
alqışlarla qarşılanıb.
Səhnələrdə həm Cümhuriyyətin
elan edilməsi tarixi, həm də
Atatürk irsi xüsusi vurğulanıb.
Sonda məktəbin musiqi
kollektivinin çıxışı tədbirə
bayram ab-havası qatıb.
TDV Bakı Türk Liseyi hər il
olduğu kimi, bu il də
Cümhuriyyət Bayramını dostluq və
qardaşlıq ruhunda qeyd edib.
|
|
